الشاعر : محمد علاء الدين
ف يوم وليله
اتغيرت
كل الخرايط ف الكتب
صبحوا العيال بيدوروا
على أسم مصر
ملقوهاش
قال الحكيم
أرسمها من وحي الخيال
أيدها اليمين كنوز دهب
والشمال واحة لازورد
راسها مينا وعينها مرسى
وقلبها .. قلعة فولاذ
نازل عليها شعرها
فاتحه بيبانها لطير نيون
جلده أمل
مش من أزاز
يوماتي يرحل للجنوب
هوه القدم
يقطف من النوبه العتيقه
ضحكها
يرميها جوه القاهره
وقلوب نحاس
تطرح غنا
درويش زمان
غنا لناسها وأهلها
ودليدا تهمس كلمتين
ف ودنها
يضحك نجيب
مع انه كان
لسه بيروي ف قصه عايشه
ف قلبها
وسومه تعلى بالغنا
عل القهوه قاعدين الحبايب
يسمعوا قصة تاريخ
حرافيش وعسكرياما عاسوا ف أرضها
لكنهم
حفنة ورق
مكتوب على جبينها الغرق
ف نيلها وف كتب التاريخ
جرس الكنيسه
كان ياما كان
يخرج بصوته والأدان
كروان وبيّرمي السلام
على قلوب المؤمنين
قال الحكيم
أرسمها من وحي الخيال
رسمتها أنا والعيال
بجناحين
بعديها قال
عيشوا بيها وورثوها
لولادكوا وولاد الولاد
يمكن أيزيس
تخرج ف يوم من قبرها
وتلم تاني شملها
وبأذن ربي وربها
يرجعلها
نبض الحياه
...
http://lmasrna.blogspot.com/ الف شكر للشاعر محمد علاء الدين على تلبيته دعوتنا للمشاركة بقصيدته
thank you ..greetings from Egypt :)
ردحذف