الاثنين، 1 نوفمبر 2010

قصيدة: يا بلدنا مات اللي اختشي





الشاعر : محمد رجب
(1)
لا للدجل والدروشة
ولا للي أبج وأرتشي
ولا للي من قوتنا انتشي
وخد في وشه وراحمشي
يا بلدنا مات اللي أختشي
          (2)
لا للقلوب المخلصة
ولا للعقول الناقصة
اللي عايزة الخصخصة
دي ناس عليمة
من اين تؤتي دي الوليمة
واحنا اللي نابنا المصمصة
والعصا لمن عصي
ولمن نسي
نص الحقيقة المدهشة
يا بلدنا مات اللي أختشي
         (3)
عالم حويطة
لا عايزة زيطة
ولا زمبيلطة
ولا هي سهلة ولا بسيطة
بتوزني دماغي الحبيبة
لأنها
مش لاقية حيطة
تمشي حتي جنبها
في المشي يحلا الدردشة
يا بلدنا مات اللي أختشي
       (4)
ع الخارطة هتلاقي الدليل
طابور طويل
هزيل ... عليل
ويقولوا نيل
أذا ما مالت الكفة يميل
ولا حد عارف ليه ومين
ولا لأمتي
هنفضل احنا ملطشة
يا بلدنا مات اللي أختشي
       (5)
ملعونة يا ابو دي السياسة
يا مفرقة الناس السواسة
لعبيد وساسة
هي السياسة
اناشيد حماسة
ولا خطب ودروشة
يا بلدنا مات اللي أختشي
     (6)
اللي عايشين في القصور
من خلف سور
و الف سور
والناس اللي بتموت في الطابور
لاجل ما في الأخر نطول
لقمة حاف
يا بلدنا يا بلاد الناس النضاف
طب ليه نخاف
قولوالي مين في بلدنا مات من غير عشا
يا بلدنا مات اللي أختشي
       (7)   
الملك لك لك يا ملك
عاش الملك
مات الملك
يا احمد عرابي
اسمع جوابي
من عاش منا ومن هلك
ايوه عبيد تمتلك
دي ناس وماشية بزمبلك
ياعرابي باشا
يا بلدنا مات اللي أختشي

     (8)
 الناس توجه وجهها
ام يمين للدينار
وام يسارا للدولار
وبشري لصناع القرار
احنا فيعصر الأذدهار
وكل الذي كان وسار كان هزار
شعب ما لوش فيالفرفشة
يا بلدنا مات اللي أختشي
   (9)
لا أنا عبيط
ولا حويط
ولا عندي مال
ولا ليا صيت
ولا حتي بيت
بس نويت انا وانتويت
لا أفول ده كان ولا ياريت
لكن أن لقيت
فرصة لأهج
وأقول يلعن ابو اللي ما منك مشي
يا بلدنا مات اللي أختشي
   (10)

يا بلدنا يا بلاد الحضارة
وقيراط من الحظ و لا
فدان شطارة
والعبارة
مش في الحديد ولا في الشيكارة
في حسن الأدارة
بالأمارة
تأتي الموافقة من قبل طرح الأمر للمناقشة
يا بلدنا مات اللي أختشي
  (11)
كلام جرايد كتها البلا
تسعي لأثارة البلبلة
قال أيه يا ناس
القوت غلا
و الزيت غلا
تسعي الحكومة جاهدة
لرفع عبء المسألة
عن الفئات العاملة
ودي قلة قليلة مهمشة
يا بلدنا مات اللي أختشي
(12)
أريد حلا
من فتوي رايحة و فتوي هلة
وكلهم علماء اجلة
و كل واحد قال ما خلا
يحيي الصليب مع الأهلة
وخلاص ما عدشالأمر علة
كل ما في الأمر قلة
تسعي لبعض المناوشة
يا بلدنا مات اللي أختشي
    (13)
 عارفة الهرم
عارفة المعابد والمسلة
عارفة المزلة
واللي خلا
العقل مني راح و ولي
كانت قادراقبل اي حاجة منك الا
يا بلدنا
تبقي بس بلاد الناس اللي ...
يا بلدنا مات اللي أختشي

http://lmasrna.blogspot.com/
* محمد رجب
شاعر مصري
نتوجه له بجزيل الشكر على مشاركته .. لوجه الله ولمصر

ليست هناك تعليقات:

إرسال تعليق